هذه المكالمة هي حالة موجودة في المجتمع :
سعيد قاعد في الشغل منهمك ومهموم.. فجأة يرن الهاتف.. يرد بصوت ضعيف: نعم..
الزوجة على الهاتف: مرحبا يا سعيد..
سعيد وقد عرفها.. بفتور: اهلا..
الزوجة: جيبلنا معك بقدونس وبندورة وبصل اخضر.
سعيد: طيب
الزوجة: شو مالك مش قادر تحكي..
سعيد: ولا شي
الزوجة: وجيبلنا قطايف.. تنساش من عند قطايفينو..
سعيد: طيب
الزوجة: اوعى تنسى وتجيب من محل ثاني.. انا ما بحب الا قطايف قطايفينو..
سعيد: حاضر يا ستي
الزوجة: وفخذة اللحمة.. شوف.. خلي اللحام يقيم شوية من الضهر وحط عليهم لحمة عجل، وخليه يفرمهم نص كفتة ونص فرمة خشنة.
سعيد: منيح
الزوجة: شو مالك بتجاوب اجوبة قصيرة..
سعيد: ابدا.. تفضلي.
الزوجة: وطلع شوية لحمة من الفخذة اعملها وخلي يقطهن..
سعيد: فهمت
الزوجة: شو هاظ.. شو فهمت؟
سعيد: ليش انت لسه ما خلصتي؟
الزوجة: لا.. والباقي اعمله شقف..
سعيد: ماشي..
الزوجة: بس شقف كبيرة مش زي المرة الماضية والله انفضحت قدام المعازيم..
سعيد: انا ما انفضحت..
الزوجة: شو حضرتك بتنكت.. ما هي كانت فضيحة وعليها شهود.
سعيد: طيب.. فضيحة.. اشي ثاني.
الزوجة: شو قصتك من سيعت ما حكيت معك بتجاوب اجوبة قصيرة كانك مستقلع مني.
سعيد: لا ابدا.. بس انا في الشغل..
الزوجة: اللي بسمعك بقول الشغل مقطع بعضه!
سعيد: يا ستي.. انا مشغول.. والله مشغول.. شو قصتك اليوم.. حلي عني.
الزوجة: ما بدي احل عنك.. بعدين شو مفكر حالك لحالك صايم.. أي كلنا صايمين.
سعيد: بعرف..
الزوجة: طيب حسن الفاظك.. واحكي عدل.. لا تنس الاغراض.
وتغلق الزوجة التلفون..
الإثنين ديسمبر 14, 2009 11:37 am